في يوم اغبر.. طاحت فيه هادي الست الكبيرة, تقريبا 80 سنة وكسرت مفصل الحوض. وللاسف راحوا بها على مستشفى(..) بمكة. وعالجها دكتور ينقال له ممتاز ومخضرم, ومن بعدها وعيونكم ما تشوف الا النور . تقرحات وجروح من عدم الحركة لانها ما اتعالجت صح..وماعادت تقدر توقف على رجلها. والان هي منومة علشان جرح اتحول لتقرحات جلدية اسفل الكعب. والي زاد الطين بلة , انها رفضت اي علاج طبيعي او حركة لمدة تقارب 17 يوم. ولما اخيرا وافقت , اذا بالدكتور الهمام يوقفها ويقولها امشي؟!! كيف يالتور تقول لوحدة قعدت اكتر من 15 يوم ما تحرك عضلات رجلها,,وكمان كسرها متعالج غلط!! المهم ان الحرمة ما قدرت ورجلها ترتجف من الضعف. ولما دخلت اشوفها, اذا بالمسكينة تبكي وتصيح انها خلاص ماعاد تقدر تمشي. الله المستعان على هيك دكترةبس يالحبايب, انا خصرت الدكتور وصرت اسوي لها تمارين وهي على السرير , وبعدين اجلسها على طرف السرير واحاول اوقفها شوي واجلسها شوي..واجلس اقرقر على راسها شوية ..
لكن الدكتور يحسب ان اسم قسمنا ( السحر الطبيعي) مو العلاج الطبيعي. فاتصل يطلب انها تمشي. وعادي موضوع الكسر القديم ماهو مهم وماعليها اشكال(بالمناسبة الدكتور باكستاني :( ! والى الان انا مستمرة معاها على نفس برنامجي انا وخاصرته..
بالله يا ناس دا عقل يفكر. والا مسؤولية اقدر اواجه ربنا يوم القيامة لما يحاسبه عليها , ايش ممكن يقول ساعتها؟؟
وسلامتكم
